Book Introductions

سن 2013 میں گھر اور دوکانوں پر مشتمل آبائی جائیداد فروخت کرکے وراثت کی تقسیم ہوئی تو میرے حصے میں 85لاکھ روپے آئے۔ بیگم صاحبہ کا اصرار تھا کہ سب سے پہلے اپنا ذاتی گھر بنایا جائے جبکہ کئی دوست مشورے دے رہے تھے کہ اپنے گھر پر پیسے لگانے کی بجائے کوئی گھر کرایہ پر لو اور یہ رقم کسی کام میں انویسٹ کر دو۔
میں ان دنوں موبی لنک میں جاب پر تھا ۔ خود نہ تو کسی کاروبار کے بارے میں زیادہ علم ہی تھا اور نہ ہی اتنا وقت تھا کہ کوئی پارٹ ٹائم بزنس ہی کیا جا سکتا تھا۔
بہت سوچ بچار کے بعد فیصلہ یہی ہوا کہ اپنا گھر تو لازمی ہونا چاہیے ،باقی ابھی جاب چل رہی ہے تو گھر بنانے کے بعد جو رقم بچے گی، اسے کہیں انویسٹ کرنے کا سوچ لیں گے۔ گھروالوں کا اصرار تھا کہ اپنا پلاٹ خرید کر گھر بنانے میں لگ گئے تواس پر کافی ٹائم بھی لگے گااور جاب کی مصروفیات کی وجہ سے نگرانی کے لیے اتنا وقت بھی نہیں ہے تو کوئی بنا بنایا گھر ہی خرید لیا جائے، لیکن میرے ذہن میں چونکہ یہ خیال اور ارادہ پہلے سے ہی موجود تھا کہ جب کبھی جاب چھوڑی تو کنسٹرکشن کے کام میں ہی قسمت آزمائی کرنی ہے، اس لیے پلاٹ خرید کر تعمیر کروانے کا پلان ہی فائنل ہوا۔
شروع میں ود میٹیریل گھر تعمیر کروانے کا سوچا لیکن پھر یہی طے کیا کہ لیبر ریٹ پر گھر بنوایا جائے اور خود اسے مانیٹر کیا جائے تاکہ مستقبل میں اس کام میں پیش آنے والے مسائل کی سمجھ بھی آ جائے۔
گھر کی تعمیر شروع ہوئی لیکن ایک ایسے لیبر ٹھیکیدارسے واسطہ پڑ گیا جو جھوٹی کہانیاں سنانے اور وعدہ خلافی میں ید طولیٰ رکھتا تھا۔ میرا مسئلہ یہ تھا کہ میں سائٹ سے لگ بھگ بیس کلومیٹر دور ایک پورشن میں رہائش پذیر تھا اور میری جاب پر رات کی شفٹ ہوتی تھی۔ میں نے نیند بھی پوری کرنا ہوتی تھی اور سائٹ پر چکر بھی لگانا ہوتا تھا۔ وہ بھائی صاحب مجھے کہہ دیتا کہ آپ پہنچیں، میں آ رہا ہوں اور میں سائٹ پر گھنٹوں اس کے انتظار میں بیٹھا خود کو کوستا رہتا کہ کس بندے کو کام دے بیٹھا ہوں۔
بنیاد سے تھوڑی اوپر چنائی ہو چکی تھی کہ میں نے اس کی مسلسل وعدہ خلافیوں کی وجہ سے فیصلہ کر لیا کہ اب مزید اس کے ساتھ چلنے کا مطلب اپنے گھر کی تعمیر کو برباد کرنا ہی ہو گا۔ میں نے اس سے معذرت کرکے اسے فارغ کر دیا۔ ساٹھ ستر ہزار روپے جو اس کی طرف فالتو گئے ہوئے تھے، ان پر بھی فاتحہ پڑھی اور باقی پراجیکٹ ایک نئے بندے کے سپرد کر دیا۔
اس گھر کی تعمیر میں کافی مسائل درپیش آئے، جو بعد میں بھگتنے بھی پڑے لیکن تجربہ بھی حاصل ہوا۔ گھرکی تعمیر کے بعد کچھ رقم بچ گئی تھی تو ایک پانچ مرلہ پلاٹ خرید کر اس پر گھر بنا کر سیل کرنے کا پلان کیا۔ کچھ دوستوں کی انویسٹمنٹ ساتھ کروائی اور یہ پراجیکٹ پایہ تکمیل تک پہنچایا۔ اس سے مزید سیکھنے کا موقع ملا۔
سن 2016 میں جب موبی لنک اور وارد ٹیلی کام کا مرجر ہوا ،تب میں نے جاب چھوڑ کر اپنے کاروبار میں آنے کا فیصلہ کیا ۔ جس گھر میں رہائش تھی اسےفروخت کیا اور ایک نیا پلاٹ خریدکر اس پر نیا گھر بنانا شروع کر دیا کہ اس کام کی مزید سمجھ آ جائے۔ اس گھر کی تعمیر کے ساتھ ساتھ اپنے حلقہ احباب میں اپنے کام کا تعارف کروانا شروع کیا اور چند ہی ماہ بعد ہمیں پہلا پراجیکٹ دس مرلہ گرے سٹرکچر کی تعمیر کا اپنے ہی ٹائون میں مل گیا۔
اس کے ساتھ پھر دو تین مزید پراجیکٹس مل گئے اور یوں یہ سلسلہ چل نکلا۔
میرا چونکہ بیک گراونڈ سول کا نہیں تھا اور میں نے جتنا بھی یہ کام سیکھا، اپنے تجربات اور مشاہدات سے ہی سیکھا تھا تو بطور اینڈ یوزرمجھے بھی کافی مشکلات اور مسائل کا سامنا کرنا پڑا۔ گھروں میں کئی ایسے مسائل آئے جو بعد میں تنگ بھی کرتے رہے، تب میرے ذہن میں یہ سوچ آئی کہ ہم نے اس شعبے میں اس طریقے سے کام کرنا ہے کہ ایک بندہ جو ہماری سروسز لے ،اسے ان مسائل کا سامنا نہ کرنا پڑے جو عام طور پر ٹھیکیدار حضرات نظر انداز کردیتے ہیں لیکن گھرمیں رہنے والوں کو بہت پریشان کرتے ہیں۔
اللہ کے فضل و کرم سے یہی نصب العین لے کر ہم اس شعبے میں چل رہے ہیں اور ہماری کمپنی الحمید کنسٹرکشن پرائیویٹ لمیٹڈ کا ماٹو ہی اپنے کلائنٹس کے لیے آسانیاں فراہم کرنا اور انہیں ٹینشن فری گھر بنا کر دینا ہے اور ہر گزرتے دن کے ساتھ ہمارا معیار بہتر سے بہتر ہوتا چلا جا رہا ہے ،الحمدللہ۔
تعمیر مسکن میرے انہی تجربات اور مشاہدات پر مشتمل کتاب ہے ۔ ایک عام بندہ جو ساری زندگی اپنے گھر کا خواب دیکھتا ہے، اس کے لیے پائی پائی جمع کرتا ہے لیکن جب وہ اس خواب کو عملی جامہ پہنانے لگتا ہے تو کسی غلط بندے کے ہاتھ چڑھ کر پریشان بھی ہوتا ہے اور اس کا گھر اس طرح معیاری بن بھی نہیں پاتا ،جس طرح اس کی خواہش ہوتی ہے ۔
اس کتاب کے نام میں مسکن سے مراد سکون والی جائے قیام ہے ۔ ایک اچھا بنا ہوا گھر بندے کو سکون مہیا کرتا ہے لیکن اگر اس کی تعمیر میں مسائل رہ گئے ہوں تو ساری زندگی بے سکونی اور پچھتاوے میں گزرتی ہے ۔ تعمیرِ مسکن لکھتے وقت یہی خیال ذہن میں ہے کہ اس میں اینڈ یوزر کو اتنا علم ضرور مل جائے کہ وہ اپنے گھر کی تعمیر میں ایک تو ترتیب کو سمجھ لے اور دوسرا اس میں جو جو مسائل آ سکتے ہیں، ان کے بارے میں کچھ بنیادی علم ضرور جان لے تاکہ اس کی جمع پونجی ضائع ہونے کا امکان کم سے کم باقی رہے۔
اللہ کے فضل و کرم اور آ پ دوستوں کی دعائوں سے تعمیر مسکن جہاں جہاں بھی پہنچی ہے ،لوگوں نے بے حساب دعائیں ہی دی ہیں ۔ اللہ اس کام کو میرے لیے، میری فیملی کے لیے اور میرے والدین کے لیے صدقہ جاریہ بنا دے اور اس کاوش کو عوام کے لیے مفید تر بنا دے۔آمین!
ہماری کنسٹرکشن کمپنی الحمید کنسٹرکشن پرائیویٹ لمیٹڈ کے نام سے سیکورٹی اینڈ ایکسچینج کمیشن آف پاکستان، فیڈرل بورڈ آف ریونیو اور پاکستان انجینئرنگ کونسل میں رجسٹرڈ ہے اور ہماری تمام تر سروسز اسلام آباد، لاہور اور فیصل آباد کے ساتھ ساتھ پنجاب کے دیگر شہروں میں بھی دستیاب ہیں۔ اس بارے میں مزید معلومات کے لیے ہمارے واٹس ایپ نمبر03008650288پر رابطہ کیا جا سکتا ہے۔